மயிலத்தமடு – மாதவனை மேய்ச்சல் தரைப் பண்ணையாளர்கள் இன்று நடுத்தெருவில் விடப்பட்டுள்ளனர்.
1500 நாட்களுக்கு மேலாக பல்வேறு வகையான வெகுஜனப் போராட்டங்களை முன்னெடுத்து வந்த பண்ணையாளர்கள், பல்வேறு விஷமிகளாலும் சில சுயநலப் போக்காளர்களாலும் கையாளப்பட்டு, அவர்களது நியாயமான கோரிக்கைகள் மலினப்படுத்தப்பட்ட நிலையில், இன்று எந்தவிதமான தீர்வுமின்றி நடுத்தெருவில் விடப்பட்டுள்ளனர்.
இந்நிலை தொடருமானால், இன்னும் சில வருடங்களில் கால்நடை வளம் முற்றாக அழிந்து போகக்கூடிய அபாயம் ஏற்பட்டுள்ளது.
பண்ணையாளர்களின் பிரச்சினைகளைப் பயன்படுத்தி தமது சுயநல நோக்கங்களுக்காக செயற்பட்ட சில புல்லுருவிகளின் செயல்களுக்கு, அவர்களது குடும்பங்களின் பாவங்களும் சும்மா விடாது.
மட்டக்களப்பு மாவட்டத்தின் எந்தவொரு பிரதேச செயலகப் பிரிவிலும் “திபுலபொத்தானை” என்ற கிராமம் இல்லை. ஆனால், தற்போது பெரியமாதவனைப் பகுதி “திபுலபொத்தானை” என அழைக்கப்பட்டு, ஆக்கிரமிப்புக்கு உட்படுத்தப்பட்டு வருகின்றது.
பல நூற்றாண்டுகளாக மேய்ச்சல் தரையாகப் பயன்படுத்தப்பட்டு வந்த மாதவனை – மயிலத்தமடு பகுதிகள், இன்று சேனைப் பயிர்ச்செய்கைக்காக ஆக்கிரமிப்பாளர்களால் பயன்படுத்தப்பட்டு வருகின்றன.
“நல்லிணக்கம்” என்ற பெயரில் இருதரப்பினரையும் ஒரே மேய்ச்சல் தரையைப் பயன்படுத்த அனுமதிப்பது, உண்மையில் பண்ணையாளர்களை அப்பகுதியிலிருந்து படிப்படியாகவும் முழுமையாகவும் வெளியேற்றுவதற்கான ஒரு திட்டமாக அமையக்கூடும்.
எனவே, மயிலத்தமடு – மாதவனை மேய்ச்சல் தரைப் பண்ணையாளர்களின் வாழ்வாதாரத்தையும், கால்நடை வளத்தையும் பாதுகாப்பதற்கான நிரந்தரமானதும் நியாயமானதுமான தீர்வு உடனடியாக வழங்கப்பட வேண்டும்
தருமலிங்கம் சுரேஷ் தேசிய அமைப்பாளர் தமிழ்த்தேசிய மக்கள் முன்னணி